Wenn in Colonia der Karneval beginnt!

Dezember, wenn et Johr am Engk, der Kölsche Feeber kritt,
hä speut vun neuem en de Häng, wenn Fastelovend kütt.
Denn jedes echte kölsche Hätz vör Freude lamenteet,
die Ahle bes zum kleinste Fetz sin wie elektriseet.
Och hät et Pandhuhs vill zo dunn, wer en der Täsch es krank,
dä brängk, wat häzo brängen hät, nom "jroße Kleiderschrank".
Su es et he bei uns Derheim stets um die Faschingszeit,
Mer sin dat anders nit jewennt, drum singt mit mir voll Freud:

Wenn in Colonia der Karneval beginnt,
wie bei dem Kölner dann das Blut so rollt und rinnt.
Jebütz weht drop loss, verrückt alle sind,
wenn in Colonia der Karneval beginnt!

En jeder Weetschaff wie bekannt, wo blos ene Anbau es,
elf Mann die arrangiere do en Setzung janz jewess.
Do sitz mer dann bes en de Naach bei kölsche Krätz un Tön,
ahn Jeckerei weht blos jedaach, et juhz de älste Möhn.
Der Präsident, dä sorg daför, dat alles richtig klapp,
un wer jet leiste kann, dä kritt ne Orde un en Kapp.
Jesunge un jeschunkelt weed, jeklatsch weed en de Häng
su lang, bes alles steiht om Kopp, der Kalk fällt vun de Wäng.

Wenn in Colonia der Karneval beginnt...

Drei Dag vör Äschermettwoch weed der Deckel dro jedonn,
die Klute süht als Rittere mer durch die Stroße jon.
De Häre dun als Klut sich ahn, als Männer sin maskeet
de Fraue, wie jesaat, die Zick es alles wie verkeet.
Et Züffje läuft als Phantasie eröm un singk met Kraff
vör luter Freud, do kummen se mem Kind der Wall eravv.
Om Quetschen büggel, op d'r Trum, do spillt un singk der Kress,
et weed nit eher opjehoot, bes alles heiser es!

Wenn in Colonia der Karneval beginnt...