Meinste dat deiht dä nit?

Wenn mer Friedags noh der Maathall jeiht,
wo met Zuppejrön et Züffje steiht,
wer dann do et Nieß, et Klör,,
et Bell ens uslaache oder uhze well,
wenn do dich dann nit verdufte deihs,
leeven Hermann, weißte wat dat heiß?
Su en Dam häs do et längs jefopp,
die schmieß dir Kühl un Kappes an d'r Kopp!

gesprochen:
Meinste, dat deiht die nit? Die deiht dat! Dat deiht die!

Wenn e Mädche krünkelich un scheif
un en Muhl hät wie en Duvesträuf,
es et noch su hässlich vun Jeseech,
ävver fuffzigdausend hät dat Weech,
sich dat Mädche jar kein Sorje mäht,
wenn dat för ne Mann janz einfach säht:
"Ich han vill Jeld, ich bin en Lieb entflammp,
sag jo, un jangk met mir nohm Standesamp!"

gesprochen:
Meinste, dat deiht dä nit? Dä deiht dat! Dat deiht dä!

Üvver manche Kellner wehd jeschant,
fuhle Spetzboov wähden se jenannt,
blos e Jlöck es, dat se ihrlich sin,
wör dat nit, wo köhm mer söns noch hin.
Kriss zo winnig do als Jass eruhs,
es morjens schon bei dir zo Huhs.
jo die Kellner sin doren sehr flöck,
weiß dä ding Wunnung, brängk et och zoröck.

gesprochen:
Meinste, dat deiht dä nit? Dä deiht dat! Dat deiht dä!

Wer noch nie en ner Damekneipe wor,
kennt nit dä Betrieb, dat es doch klor.
Dunn nur öhndlich Jrosche en de Täsch
un sag paarmol: "Fräulein, noch en Fläsch!"
Solls ens sin, wat do do Anklang fings,
ein sitz rechts bei dir, dat andre links.
Es et Jeld dann all un sähs: "Komm Nutz
no jevv uhs Dankbarkeit mir och ne Butz!"

gesprochen:
Meinste, dat deiht die nit? Die deiht dat! Dat deiht die!