Dä muß nit he jebore sin

Jeder deiht wahl wesse, dat em Deutsche Reich
et e Städtche jitt, wat Kölle heisch.
doren wunne friedlich Minsche allerhand,
die, wenn Fastelovend, all uhs Rand un Band.
Dann die Eijenahte, die dat Städtche hät,
all die opzozälle, wör zovill, ich wett.
Jedenfalls persönlich han ich nix dovun,
wenn ich he behaupten dun:

Wer nie e kölsch Glas Wiess
un dann e Schnettche Kieß
verzehrt hät met Aptit,
der kennt dat Levve nit.
Och wem die Name fremb,
wie "Früh" un "Schebens Tünn"
der muss wohl nit en Kölle
he am Rhing jebore sin.

Jeht mer no d'r Maathall, vuljo Aldemaat,
es dat nit en Bildche janz apaat,
wo met Kürf en Reihe morjens die Frau Siev
secher keinem Antwoot schöldig bliev.
Wo et Schratels Lena säht däm Hähr jescheit,
der sich alles ahnloht un nix kaufe deiht:
"Jangk, do käufs jo doch nix, ahle Pavian!"
Dat kann mer blos en Kölle han:

Wer nie dat Woot om Maat
jehoht un kräg jesaht,
wenn och nit op Latein:
"Do scheife Lansenein",
och wem die Name fremb,
wie Stina, Züff un Plünn,
der muss wohl nit en Kölle
he am Rhing jebore sin.